O plan de prevención do suicidio en Galicia poderá presentarse en próximas semanas

O conselleiro de Sanidade, Jesús Vázquez Almuíña, anunciou que o plan de prevención do suicidio en Galicia está "a piques de finalizarse" e poderá ser presentado nas próximas "semanas, meses".

Así o dixo no pleno do Parlamento, ante a interpelación da deputada de En Marea Eva Solla, quen trasladou denuncias relativas ás áreas de psiquiatría de varios centros galegos, nunha situación que tachou de "penosa" e con "escaseza" de medios.

Pola súa banda, o conselleiro negou falta de recursos nin de persoal, e defendeu actuacións de mellora do servizo na comunidade galega.

A maiores, sinalou como outro "gran reto" o plan estratéxico de saúde mental co horizonte de 2020, no que a Xunta, segundo destacou, tamén está "a traballar".