Pacto entre PSOE e Goberno para que os desafiuzados recuperen a súa casa

|

Desafiuzamentos


O Goberno e o PSOE pecharon un acordo para presentar no prazo de oito meses un plan con medidas dirixidas a facilitar a recuperación da propiedade da vivenda ás persoas en situación de vulnerabilidade económica que estean inmersas nun proceso de desafiuzamento por falta de pagamento de hipoteca.


Este compromiso está incluído no acordo subscrito entre ambas as partes para aprobar a prórroga da moratoria antidesafiuzamentos outros tres anos máis e que o Consello de Ministros aprobou este venres, segundo informaron fontes socialistas.


En concreto, o plan de medidas dirixirase a debedores hipotecarios incluídos na moratoria de desafiuzamentos, que son aqueles que se atopen en supostos de especial vulnerabilidade, e sempre que o embargo se refira á vivenda habitual.


Algunhas destas medidas permitirán o desconto de parte das cantidades achegadas pola persoa desafiuzada para a amortización do préstamo hipotecario ou as melloras realizadas durante o período no que estivo suspendido o lanzamento. Entre outras medidas, as fontes consultadas aseguran "un prezo equitativo na recuperación da vivenda, evitando situacións de asimetría neste proceso".


"O obxectivo é que os acredores compartan as perdas cos executados e se desconte do prezo para percibir polo banco unha parte pagada polo executado e que só cubriu o aumento artificial de prezo causado pola oferta excesiva de crédito e a burbulla inmobiliaria", sinalan desde o PSOE.


Para aquelas persoas que fosen desafiuzadas e que se atopen "no limiar de exclusión", o acordo contempla que poidan solicitar e obter o aluguer da mesma por unha renda anual máxima do 3% do seu valor.


DEREITO DE ALUGUER


Esta solicitude poderá realizarse en seis meses desde a entrada en vigor do decreto lei que aprobará o Executivo para aquelas persoas que se beneficiaron da suspensión e desde que se produza a suspensión do lanzamento para quen se beneficie con posterioridade.


O aluguer social terá unha duración anual, prorrogable a vontade do arrendatario, ata completar cinco anos, e coa posibilidade de ampliarse de forma anual outros cinco anos máis, por mutuo acordo entre as dúas partes.


PRÓRROGA DA SUSPENSIÓN DE DESAFIUZAMENTOS


O Consello de Ministros aprobou este venres o real decreto lei que amplía a suspensión dos lanzamentos hipotecarios de vivenda habitual en tres anos, ata 2020. Trátase da segunda vez que se estende esta suspensión, despois de que en febreiro de 2015 o Consello de Ministros aprobase estendela tamén en dous anos, ata 2017. O mes pasado, o Ministerio de Economía, Industria e Competitividade xa anunciou a súa intención de amplialo ata xaneiro de 2019, pero finalmente estenderase ata 2020.


Este real decreto lei tamén profunda nas medidas de protección a colectivos vulnerables pola crise ante o desafiuzamento da súa vivenda xa existentes, xa que inclúe nos supostos que poden beneficiarse das mesmas ás familias con fillos menores de idade (non soamente con menores de tres anos ao seu cargo como ata agora) ou monoparentais con fillos a cargo (eliminando o mínimo de dous fillos en familias monoparentais), en situación de desemprego, discapacidade, dependencia, enfermidade grave ou violencia de xénero.


En concreto, o últimos cinco supostos xa se aplicaban na suspensión de lanzamentos e a partir de agora esténdense ao Código de Boas Prácticas. O suposto de situación de paro amplíase na suspensión de desafiuzamentos, xa que se elimina o requisito de esgotar as prestacións de desemprego.


Esta medida, que está en vigor desde 2013, foi elaborada cun "amplo consenso", segundo explicou o Ministerio nun comunicado. Pola súa banda, o ministro titular, Luis de Guindos, explicou na rolda de prensa posterior ao Consello de Ministros que confía en que a aprobación deste real decreto lei teña un "apoio moi amplo" no Congreso.

relacionada Suspendido o xuízo para desafiuzar unha familia de Ferrol con cinco fillos menores de dez anos
relacionada Aprazan 10 días o desafiuzamento de Inés, Gerardo e os seus tres fillos

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress