Unha semana enteira para preparar o derbi de Riazor
O Dépor, sen compromisos entre semana, deixa atrás a vitoria fronte ao Barça e ponse a punto para recibir o Celta.
O Dépor ponse a punto para o domingo. //Fonte: RC Deportivo
Coa vitoria ao Barça xa no retrovisor deportivista, os branquiazuis comezaron xa a centrarse no derbi do domingo en Riazor. Os de Pepe Mel teñen planeados cinco adestramentos, un deles, o do xoves, a porta pechada no propio estadio que será escenario do encontro. Só hai descanso para os futbolistas este martes, tal e como informa o RC Deportivo na súa web.
Este luns retomaron as sesións en Abegondo, con énfase especial para os que non foron titulares no partido do domingo. Pepe Mel incidiu na posesión, os remates a portería e, para acabar, dispuxo dun partido en espazo reducido, de alta intensidade. Mentres, o once inicial tivo unha sesión de recuperación e ximnasio.
Sobre o derbi falou Florin Andone, que destacou que "agora parece que o futbol está a darnos o lado bo, o da sorte, e estamos moi felices, confiados nesta boa recha".
Por iso, confía en gañar ao conxunto vigués, que supón "un paso importante para o noso obxectivo e para a nosa confianza, que cada día está a crecer polo momento que estamos a atravesar". "Vou poñer a man no lume polo meu equipo, imos facer as cousas ben, merecemos esta vitoria máis que eles e oxalá quede o partido na casa", desexou. Con todo, lembra a derrota sufrida na primeira volta e que nun derbi "non hai favoritos".
Recoñece que, pola súa banda, "hai ganas de desquite" e que "é o mellor momento" para sumar. "Imos tentar gañar por nós, para levar o Deportivo a unha zona tranquila e pola afección que sempre está do noso lado", finalizou.
Escribe o teu comentario