Cor, baile e deporte únense no Holi Gaiás
A Cidade da Cultura celebra o día 25 de marzo unha carreira de 5 quilómetros que incorpora elementos do festival Holi, tamén coñecido como festival das cores.
O Holi é un festival de primavera hindú que se celebra na India e Nepal, tamén coñecido como o "festival das cores" ou "festival do amor", e que inaugura a entrada da primavera. Esta nova estación é conmemorada cunha explosión de cores, que o Gaiás decidiu incorporar na súa programación de marzo, acompañándoa ademais dunha carreira popular de cinco quilómetros polas áreas verdes do Gaiás baixo o título de Holi Gaiás.
Coa colaboración da Fundación USC Deportiva, a Federación Galega de Atletismo e o patrocinio de Viaqua, o Holi Gaiás preséntase como unha proba lúdica coa que recibir a primavera no Bosque de Galicia.
Os participantes deberán levar zapatillas de deporte e estar dispostos a "divertirse, bailar, mancharse con pos de cores, e como non, facer algo de deporte", indican na páxina web da Cidade da Cultura.
Escribe o teu comentario