Baltar pretende impulsar "trens lanzadeira" entre Ourense e as vilas da provincia

O presidente da Deputación de Ourense, Manuel Baltar Blanco, anuncia nunha entrevista a súa intención de impulsar "trens lanzadeira" entre a capital e as principais vilas da provincia. O mandatario provincial, cuestionado en Telemiño, recoñeceu que as conexións de transporte metropolitano son "unha materia pendente", pero o seu executivo baralla un plan para mellorar as conexións. "Procuramos buscar espazos de entendemento, cónstame que está en vías de solución", declarou.

POTENCIAL DA PROVINCIA

Manuel Baltar insistiu na entrevista nas súas iniciativas ligadas ao potencial termal da provincia. "Soño co gran hotel balneario da cidade", sobre o que afirmou que "hai investidores dispostos a facer o desembolso, pero cun problema urbanístico que imos solucionar identificando a parcela e usando o procedemento que permite a lei". Ademais, lembrou a elaboración do Plan provincial coa Xunta, "executado ao 52% e cun esforzo investidor detrás moi importante".

Non deixou pasar tampouco outro das cuestións prioritarias para o seu executivo, ao redor do concepto de "provincia intelixente". "En 2017 veremos o centro tecnolóxico que estamos a desenvolver da man de multinacionais como IBM e Vodafone, que xerou ganas de ser estudado noutros territorios", destacou Baltar.

EN CONTRA DAS FUSIÓNS DE CONCELLOS

O presidente provincial defendeu o papel das Deputacións, cuestionadas por parte da cidadanía e da clase política. "Facemos máis, temos a vocación de chegar onde ninguén máis o fai. Unha das razóns polas que pode suceder isto é a non elección directa dos deputados provinciais, algo que reivindico sempre porque supón lexitimidade democrática", insistiu.

Relacionado con este tema, mostrou o seu rexeitamento ás fusións de concellos. "Estou en contra, o que funciona é fusionar servizos, iso é fusionar e o que nós facemos", argumentou.

SITUACIÓN XUDICIAL

Manuel Baltar respondeu tamén acerca da súa situación xudicial, onde está investigado por suborno e tráfico de influencias. Así, respondeu sobre a decisión que tomaría se a xuíza encargada do caso decidise procesalo: "Nese suposto, é un tema tan absolutamente mentira, que teño claro que en absoluto vou deixar as miñas responsabilidades. É un tema tan 'empociñado' que só pode ter unha resposta, reivindicar o meu papel público, non lle dedico nin unha décima de segundo", confesou Baltar.

Ademais, insitiu en pedir que se "respecte" a presunción de inocencia e que o caso é "unha gran montaxe e chantaxe aproveitadas por alguén para facer dano".