Piden incluír a 'mámoa' de Guilán, en Xove, no catálogo de xacementos arqueolóxicos
A asociación Mariña Patrimonio destaca as "monumentais dimensións" deste túmulo e o seu "bo estado de conservación" para xustificar a súa solicitude á Xunta.
A asociación Mariña Patrimonio solicita á Xunta a inclusión no catálogo de xacementos arqueolóxicos da 'mámoa' de Guilán, na Rigueira (Xove, Lugo).
Este sepulcro prehistórico da época megalítica, como explicou a citada entidade a través dun comunicado, ten un diámetro de aproximadamente 30 metros e unha altura de 2,5 metros.
Ao seu entender, as "monumentais dimensións" deste túmulo, o seu "bo estado de conservación" e o feito de "manter o dolmen" converten a 'mámoa' de Guilán "nunha das máis espectaculares e importantes de toda a Mariña" luguesa.
En paralelo á petición a Patrimonio, a aula de Formación do Concello de Xove acollerá o vindeiro sábado unha conferencia do arqueólogo Ignacio Vilaseco Vázquez sobre este monumento megalítico.
Ademais, antes da conferencia, realizarase unha visita organizada a este xacemento e ao círculo de Lavandeira.
Escribe o teu comentario