Os empresarios de Pontevedra aproban o seu cesamento temporal na CEG

A confederación de empresarios de Pontevedra (CEP) aprobou por unanimidade o cesamento temporal de participación nos órganos de goberno da patronal galega, este luns nunha reunión que se celebrou en Lalín.

Así o comunicou o presidente dos empresarios pontevedreses, Jorge Cebreiros, nunha comparecencia pública acompañado polo seu equipo de goberno.

O comité directivo e o permanente da CEP acordaron esta proposta de suspensión temporal de participación nos órganos de goberno da confederación de empresarios de Galicia (CEG) ou "cesamento temporal da convivencia", en palabras de Cebreiros.

Esta decisión será elevada á asemblea da CEP para que esta, de proceder, a ratifique a finais de marzo. Tamén se prevé trasladar ao consello asesor da confederación pontevedresa e ao da galega.

"NON É UNHA RABECHA"

Jorge Cebreiros subliñou que isto "non é unha rabecha", se non "unha mensaxe para trasladar aos actuais dirixentes da CEG, que han de reflexionar sobre o modelo de confederación que represente a todos os sectores".

O ocorrido no último mes --cando se celebraron eleccións na patronal galega e saíu vencedor o coruñés Antón Arias cun 60% dos votos-- "non é o que gusta" aos empresarios de Pontevedra, segundo lamentou Cebreiros.

Por iso, sinalou que a intención é "visibilizar" a súa postura co "cesamento temporal de participación en actividades como son xuntas directivas, comités executivos ou xuntas de vicepresidentes". "Porque non queremos perder o tempo", incidiu.

De feito, a CEP quere centrarse, segundo dixo, "nos problemas" dos seus sectores, que representan "unha porcentaxe moi importante do PIB de Galicia" e, segundo os seus números, "máis do 40% en número de traballadores".

A problemática, explicou, é "moi específica no territorio" e derívase da "falta de infraestruturas" e de investimentos e pola competencia que supón o norte de Portugal. "Queremos unha CEG á altura da defensa das necesidades dos empresarios de Pontevedra", salientou.

A CEP considera, tras a presentación a última hora da candidatura de Arias, impulsada pola confederación da Coruña --que lidera Antonio Fontenla--, que a crise da institución pechouse "en falso".

Por iso, Cebreiros reiterou que o que buscan os empresarios pontevedreses é motivar "unha reflexión" sobre o modelo e que se recoñeza "que algo se fixo mal". "Non falamos de pedir perdón, simplemente que esta non é a imaxe que queremos trasladar, isto non é un Xogo de Tronos", profundou.

O obxectivo, segundo insistiu, é que os dirixentes actuais galegos "entren en razón" acerca do que necesita Pontevedra e Galicia dunha confederación empresarial que sexa representativa.

REFORMA LABORAL

Por outra banda, pero aínda nesta liña, Jorge Cebreiros considerou "difícil" poder compartir declaracións que está a facer "semana tras semana" a nova dirección da CEG respecto da reforma laboral e da actual situación do mercado de traballo.

"Difícil compartir declaracións cando non foron debatidas en ningún órgano", segundo afirmou, antes de remarcar que a CEP é contraria a difundir a idea de que se non se soben os salarios aumentará a conflitividade, nun momento no que está a negociar convenios colectivos cos sindicatos.

OURENSE DESVINCÚLASE DAS DECLARACIÓNS DE ARIAS

A Confederación Empresarial de Ourense (CEO) afirma que a crítica á reforma laboral "será unha opinión persoal" do novo presidente da patronal galega, Antón Arias, xa que esta cuestión "en ningún momento" se chegou a debater na institución, a pesar das declaracións públicas realizadas respecto diso pola organización.

Os empresarios ourensáns veñen de emitir un comunicado de prensa este luns para destacar que non comparten "en absoluto as declaracións do presidente da Confederación de Empresarios de Galicia (CEG) respecto da reforma laboral e o emprego".

Ademais, a CEO avisa de que estas manifestacións contraveñen "a opinión xeneralizada da Confederación Española de Organizacións Empresariais (CEOE) e da CEO en particular".

Para a CEO, de feito, a reforma laboral "foi e é un alicerce fundamental na recuperación económica das empresas, que axudou á creación de emprego dos últimos anos axudando a cambiar a tendencia de destrución de emprego, crise económica xeneralizada e peche de empresas que se padeceron nos anos máis virulentos da última e recente crise".