O Celta cae pola mínima en Balaídos ante o Shakhtar Donetsk

Avisaba Berizzo antes do primeiro partido da eliminatoria do perigo que supón o Shakhtar á contra. E non ía desencamiñado. Un contragolpe na primeira parte puxo o marcador final nun encontro no que o Celta non tivo puntería.

O Celta caeu por 0-1 no primeiro partido de dezaseisavos de final da Europa League. O equipo vigués foi de menos a máis e chegou a ofrecer momentos de bo fútbol. A pesar de facerse co partido no segundo tempo e encadear suficientes chegadas de perigo como para macar, o empate non chegou.

Os galegos protagonizaron numerosas chegadas á área rival no primeiro tempo e, con todo, apenas remataron a porta. Bongonda e Guidetti tiveron boas ocasións para marcar, pero non definiron con acerto. Cando mellores sensacións ofrecían os de Berizzo chegou o gol ucraíno, á contra, tras unha falta a favor dos celestes. Gustavo Blanco marcou tras un resbalón de Cabral e un rexeite de Bongonda.

Os vigueses melloraron trala continuación. O cadro céltico fíxose co balón e acumulou ocasións. Pero enfronte estaba o Shakhtar, un equipo rochoso e ordenado, cun nivel de presión moi alto e que saía á contra cunha velocidade endemoniada.

Non se renderon os xogadores do Celta en busca do gol. Non chegou e agora o equipo deberá viaxar a Ucraína para tentar darlle a volta á eliminatoria. O vindeiro xoves, o desenlace.

FICHA TÉCNICA

0-CELTA: Sergio, Hugo Mallo, Cabral, Roncaglia, Jonny, Radoja (Jozabed, min.74), Wass, Pablo Hernández, Iago Aspas, Bongonda (Sisto, min.57), Guidetti (Rossi, min.84).

1-SHAKHTAR: Pyatov, Srna, Ordets, Rakitskyy, Ismaily, Fred, Malyshev, Marlos (Azevedo, min.90), Dentinho (Kovalenko, min.46), Taison (Bernard, min.83), Blanco.

Goles: Gustavo Blanco, 0-1, min.26.