O PSOE pide "rescatar do esquecemento" o Couto Mixto e dar dobre nacionalidade aos seus habitantes

O senador do PSOE por Ourense, Luís García Mañá, pediu este xoves ao Goberno que "rescate do esquecemento" ao Couto Mixto e que realice os trámites necesarios para que os xa escasos habitantes deste enclave fronteirizo entre Galicia e Portugal gocen da dobre nacionalidade española-lusa.

Nunha iniciativa parlamentaria, o socialista lembra como, coa aprobación do Tratado de Lisboa en 1864, Portugal renunciou en favor de España aos dereitos sobre os pobos do Couto Mixto, un xesto que España compensou coa cesión dos "pobos promiscuos".

O territorio do Couto Mixto abarcaba entón catro aldeas que hoxe se sitúan na provincia de Ourense. Unha delas (Pena) desapareceu co paso do tempo, pero sobreviviron Santiago e Rubiás, en Calvos de Randín, e Meaus, en Baltar.

Para este territorio dispúxose un amplo corpus de privilexios, como a exención de impostos e de achegar soldados, e ademais permitiuse aos seus habitantes decidir --ata 1868 como mínimo-- se preferían a nacionalidade española ou a portuguesa.

Visto que en 2014 os habitantes de Olivenza e Táliga, dous pobos estremeños que pertenceron a Portugal ata 1801, conseguiron o dereito de optar á dobre nacionalidade, García Mañá demandou que se estenda tamén aos "moi poucos" veciños do Couto Mixto e aos dos tres lugares portugueses dos chamados "pobos promiscuos".