O Deportivo cae ante o Athletic de Bilbao (2-1)

O Deportivo segue sen lograr a ansiada primeira vitoria a domicilio, tras sucumbir ao empuxe dun Athletic que acabou dando a volta ao marcador ao bordo do minuto 90.

O primeiro cuarto de encontro desenvolveuse con longas posesións de ambos os conxuntos, e con maior control dun Dépor que só entrou na área local mediante dous centros de Kakuta. 

Andone tivo unha opción moi clara no minuto 32, tras un pase de Borges, pero non foi capaz de precisar o golpeo no cara a cara con Iraizoz. O esférico marchouse desviado, pola liña de fondo.

O Athletic achegouse á portería branquiazul no minuto 41, nun desborde polo extremo dereito de Iñaki Williams, cuxo centro atopou a cabeza de Raúl García. O croque do centrocampista navarro foise por encima do traveseiro.

E inmediatamente, adiantouse o Dépor. Emre Çolak recibiu de Juanfran, completamente só en mediocampo, xa no terreo branquivermello, e correu decidido cara á portería branquivermella. Cando os centrais ían saír ao paso, o turco conectou un poderoso zurdazo cun enveneado efecto cara a fóra que entrou pegado ao poste dereito do marco de Iraizoz. Foi o terceiro tanto do mediapunta no que vai de tempada, o primeiro coa súa perna boa.

Co 0-1 chegouse ao descanso. 

Na segunda parte do partido o Athletic fíxose co control do partido, aínda que o Dépor foi capaz de defenderse con solvencia, con grandes axudas dos extremos aos laterais para tapar as vías de entrada ao equipo rival.

No minuto 65 Garitano deu a alternativa a unha das fichaxes de inverno, o holandés Ola John, que substituíu a outra das incorporacións invernais, Kakuta.

Cando o partido chegaba ao minuto 71, produciuse o empate do Athletic. Markel Susaeta centrou desde o extremo dereito, Aduriz cabeceou picado, Tyto non foi capaz de atallar a pelota e apareceu para remachala Muniain.

E cando ambos os equipos non buscaran con todas as súas armas o gol da vitoria, o Athletic atopouno nun contragolpe, xa roldando o minuto 90, no que finalmente o balón chegou de rebote a Aduriz, en posición lixeiramente adiantada. O dianteiro branquivermello aproveitouse diso e definiu con tranquilidade no man a man con Tyto.