Os traballadores anti incendios fixos descontinuos reincorpóranse a partir do 1 de marzo

Os traballadores fixo descontinuos do Servizo de Prevención e Defensa Contra Incendios Forestais (SPDCIF) da Xunta volverán ao servizo activo a partir do próximo 1 de marzo co obxectivo de "reforzar os traballos de prevención" antes de iniciarse "a precampaña da primavera".

Diso informou este sábado a Consellería do Medio Rural a través dun comunicado no que engade que a reincorporación destes 621 brigadistas xa foi trasladada aos seus representantes sindicais.

Estes bombeiros forestais permanecen activos durante un período de nove meses e pertencen ás categorías de "xefes de brigada, peóns, peóns condutores, oficiais de defensa contra incendios, condutores de motobomba, emisoristas e vixiantes".

Segundo lembra a Xunta, esta medida "adóptase todos os anos antes da chegada da primavera, de acordo coas necesidades de programación e planificación e en función das circunstancias climatolóxicas presentes e previstas".