Asturias detecta a praga que afecta as patacas en zonas próximas a Galicia
O Principado elabora un rexistro no que todos os produtores, incluídos os de autoconsumo, teñen que declarar canto van sementar este ano.
O Boletín Oficial do Principado de Asturias (BOPA) publica este venres a resolución transitoria pola que se declara a presenza da praga da 'Tecia solanivora', coñecida como polilla guatemalteca da pataca, nos concellos de San Tirso de Abres, Vegadeo, Castropol, Taramundi, Navia, Valdés e Cudillero, e establécense actuacións para o seu control, ademais de desaconsellar a semente do tubérculo.
Na actualidade, a praga da pataca afecta a diversos municipios galegos, entre eles varios na Mariña Luguesa, lindeira con Asturias. Ademais, a resolución tamén declara zona de especial vixilancia, pola súa colindancia cos concellos afectados e a evolución xeográfica que está a manifestar a praga, os concellos de Tapia de Casariego, El Franco, Coaña e Villayón.
Entre as medidas transitorias que recolle a resolución está que os operadores --produtores ou comercializadores-- de pataca deberán notificar de forma inmediata á Consellería de Desenvolvemento Rural cando detecten síntomas ou sospeiten que poida estar presente a polilla nas súas instalacións.
Ademais, co fin de dispoñer de maior información sobre a superficie plantada e, en particular, a dedicada á produción de pataca para o autoconsumo, e a súa distribución en Asturias, os comerciantes ou puntos de venda de pataca de sementa "solicitarán dos compradores de pataca de semente a seguinte información: nome e apelidos, teléfono, cantidade adquirida e parcela ou lugar de semente". Esta información estará a disposición dos servizos de sanidade vexetal da Dirección Xeral de Desenvolvemento Rural e Agroalimentación.
"Todo produtor de pataca, tanto profesional como de autoconsumo, localizado en calquera dos concellos declarados con presenza da praga e dos concellos da zona de especial vixilancia, deberá declarar a superficie plantada ou que vai plantar neste ano", engade.
Igualmente, a detección da praga en tubérculos que se localicen en almacéns ou cultivos, dos municipios afectados ou non, implicará a súa inmediata eliminación controlada.
"A administración local reforzará a vixilancia da procedencia dos tubérculos que se vendan nos mercados locais, constatando a orixe da pataca comercializada e adoptando medidas para impedir no seu caso a súa circulación", apunta o Principado.
Así mesmo, "en tanto se aprobe a normativa estatal, recoméndase non plantar pataca nas zonas afectadas". Tras a publicación do programa nacional de control e erradicación do patóxeno, a presenza da praga nos cultivos das zonas afectadas supoñerá que estas sexan declaradas como infestadas, procedéndose ao arranque e destrución de colleita.
Escribe o teu comentario