A Policía convoca 40 prazas para Galicia, cando faltan 646 axentes

O Sindicato Unificado de Policía (SUP) informou de que a Dirección Xeral da Policía deu a coñecer este mércores a relación de vacantes que pretende convocar no próximo Concurso Xeral de Méritos das Escalas Básica e Subinspección cuxa publicación se fará no mes de marzo.

Segundo concretou o SUP, convócanse 40 prazas para toda Galicia, "sendo o déficit actual de 646 (20,5 por cento)". Neste sentido, denunciou que a Dirección Xeral de Policía non teña en conta que Galicia presenta "o maior déficit de persoal dos últimos 20 anos".

"Obviou a situación límite que sofren a maior parte dos cadros de persoal policiais da comunidade nos que a falta de efectivos está a provocar o peche parcial ou total de comisarías e servizos, o desmantelamento de grupos de investigación ou o desvío de servizos a outros Corpos de Seguridade cuxa competencia corresponde á Policía Nacional", esgrime o SUP, nun comunicado.

"Os policías seguiremos dando o mellor de nós mesmos a pesar da inseguridade xurídica que implica servir aos cidadáns con leis ambiguas, medios escasos e un horario e soldo non acorde co noso esforzo", engade.

Por último, manifestou que espera que se "reconsidere" esta convocatoria e, "cando menos, poña un parche a curto prazo coa asignación de servizos extraordinarios suficientes".

"ABANDONO TEMERARIO" DE PONTEVEDRA

A Unión Federal de Policía anunciou que recorrerá a proposta de prazas da Dirección Xeral de Policía para as comisarías de Pontevedra, ao considerar que é unha "burla" para profesionais e usuarios e supón "o abandono temerario" da provincia, que insistiu en que xa ten carencias de persoal.

Así as cousas, o sindicato manifestou nun comunicado que axentes da Policía Nacional en Pontevedra se senten "ninguneados e abandonados pola administración", polo que instará a modificar "este esperpento de prazas", de forma "que se cubran minimamente as graves deficiencias que hai".

Trátase dun obxectivo para o que reclamou que tanto os deputados e senadores por Pontevedra como as institucións, alcaldes e asociacións da provincia "se sumen a esta esixencia" e pidan unha reunión coa subdelegada do Goberno.

Da mesma maneira, pediron que os responsables policiais "soliciten urxentemente" axentes, pois "é imposible dirixir o servizo policial sen efectivos suficientes"; e que o xefe superior de Policía de Galicia "faga valer a súa condición de máximo xefe e defenda os policías de Galicia".