Denuncian "pseudo caciquismo" nas contratacións de radioloxía en Santiago
A CIG-Saúde refírese a que este servizo ten "de man" a determinados técnicos aos que ofrece contratos cando lles correspondería a outros mellor situados nas listas.
A CIG-Saúde denunciou "falta de imparcialidade" e "trato de favor" nas contratacións para o servizo de radioloxía da Xerencia de Xestión Integrada de Santiago de Compostela.
Nun comunicado remitido aos medios, o sindicato denunciou que neste servizo se practica un "rancio pseudo caciquismo" ao "ter de man" a determinados técnicos especialistas en radioloxía (TER) aos que ofertarlle contratos, "en detrimento de outros aos que lexitimamente lles correspondería pola orde de prelación nas listas".
Esta "falta de imparcialidade" para a CIG-Saúde débese "en gran medida" ao feito de que unha mesma persoa ostente os cargos de director de recursos humanos e de presidente da Comisión periférica de contratacións, cuxas funcións "se contrapoñen frontalmente".
"Non existe unha actuación transparente na xestión ao non respectar o principio de imparcialidade e non asegurar un trato igual e sen discriminación de ningún tipo no exercicio das súas funcións", lamentou o sindicato.
Escribe o teu comentario