As enfermeiras imitarán unha lexión romana ante a sede do Sergas

O Sindicato de Enfermería en Galicia (Satse) concentrarase este luns 6 de febreiro á unha da tarde na explanada do Servizo Galego de Saúde en Santiago de Compostela para "facer visible" a súa reclamación de reactivar a Carreira Profesional.

Segundo anunciou a organización este domingo a través dun comunicado, os enfermeiros do Satse "volverán tirar de imaxinación" e "enfrontaranse a esta batalla simulando as antigas lexións romanas". Neste sentido, o colectivo lembrou que en ocasións anteriores xa apostaron por un 'flashmob' e un rap para lograr que a súa reclamación chegue ao Sergas, que, "ata o momento", non deu mostras de querer negociar a Carreira Profesional.

Así mesmo, o vindeiro venres 9 o conselleiro de Sanidade, Jesús Vázquez Almuíña, recibirá ao Satse e a outras organizacións sindicais nunha reunión na que, segundo o comunicado, "demandarán que se convoque de forma inmediata a mesa sectorial e que se estableza un calendario negociador con prioridade na Carreira Profesional".

Doutra banda, o sindicato iniciou a semana pasada unha petición na plataforma Change.org dirixida á Consellería de Sanidade titulada 'Necesitámosche! Axúdanos a facer valer a nosa sanidade e aos nosos profesionais', que nas primeiras horas superou as mil asinas.