A AELG propón celebrar un Sant Jordi galego o Día de Rosalía
A asociación de escritores convida a que a cidadanía e os centros educativos se impliquen na conmemoración.
A Asociación de Escritoras e Escritores en Lingua Galega (AELG) organiza diversos actos con motivo do Día de Rosalía de Castro, que se conmemora o 24 de febreiro, entre eles lecturas públicas de libros da autora. Tamén insta á cidadanía a regalar ese día un libro en galego e unha flor.
Ademais do acto central que terá lugar o 19 de febreiro no Panteón de Galegos Ilustres, a AELG está a organizar lecturas públicas da obra de Rosalía de Castro. En todos estes actos, lerase un manifesto que este ano elaborará a escritora Ledicia Costas.
Por outra banda, para estender "o poder da palabra" da escritora galega, a AELG convidou a celebrar o Día de Rosalía de Castro nos centros educativos "con estas accións colectivas de difusión da súa obra", sinala.
Para a educación Secundaria e Bacharelato, propón a gravación nos centros de educación dun mannenquin challenge --o 'reto do maniquí', unha moda viral que consiste en gravar un grupo de persoas inmóbiles--, "onde o alumnado interaccione visualmente coa obra ou a figura de Rosalía", explica.
Para educación Infantil e Primaria, propón que cada alumno ou alumna elabore unha máscara da escritora. Tamén proponse facer fotos coa máscara de Rosalía e cun un cartel cun verso que escollan.
Escribe o teu comentario