Rueda destaca o "envellecemento" como o gran reto do modelo de financiamento

O vicepresidente da Xunta, Alfonso Rueda, manifestou que os preparativos da VI Conferencia de Presidentes, que se celebra este martes en Madrid, fan "presaxiar" que o resultado "pode ser bo", e confiou en que isto permita "empezar a discutir xa un novo modelo de financiación" para as comunidades autónomas, onde se teñan en conta aspectos "tan importantes" como o gasto sanitario e o "necesario financiamento da dependencia", entre outras cuestións. Por iso, censurou as ausencias de Cataluña e País Vasco.

En declaracións aos medios, Alfonso Rueda, que participou nas reunións preparatorias desta reunión, tamén destacou que se chegue a esta reunión coa idea de unha "estratexia conxunta" entre o Goberno e as comunidades sobre demografía e "os retos que supón" o envellecemento poboacional para autonomías como a galega, un aspecto que, dixo, "necesita ter unha derivada no novo modelo de financiamento".

Para o vicepresidente da Xunta, tamén é "fundamental" que se fale dun "pacto nacional pola educación", tras os "sucesivos fracasos".

"En definitiva, Galicia está a celebrar que teña lugar esta conferencia e que se acorde a periodicidade anual", remarcou Alfonso Rueda, quen incidiu na relevancia do "espírito de diálogo" e que iso supoña "acordos de moito calado", "non pensando en territorios nin en cuestións identitarias, senón en cuestións que afectan ao día a día" e "pensando nas persoas".

Preguntado por se considera que a conferencia facilitará posteriormente o pacto para un novo modelo de financiamento autonómico, Rueda indicou que a reunión deste martes supón "un punto de partida" que "necesitan o acordo de todo o mundo, con independencia de cores políticas" e iso, á súa vez, facilitará que "se chegue a acordos concretos".

Ao seu xuízo, que se aborden cuestións como a sanidade e a demografía como asuntos que hai que ter en conta, é "fundamental" para "avanzar nos temas concretos". "Se non se obtivese ese acordo de principio, sería máis difícil materializalo en acordos concretos", aseverou.

"ERRO" DE CATALUÑA E PAÍS VASCO

Neste escenario, tachou de "erro" que País Vasco e Cataluña non acudisen á Conferencia de Presidentes, porque nela abórdanse "acordos que afectan a todos".

Fronte a iso, subliñou que "é bo que Galicia estea e que se vaian a tratar temas que expuxo" a comunidade que goberna Alberto Núñez Feijóo. "Será responsabilidade de todos que se poñan en pé" os acordos, remarcou.

Ademais, o vicepresidente da Xunta considerou "un bo síntoma" que vaia a haber unha reunión anual dos presidentes das comunidades autónomas e atribuíuno á capacidade de "diálogo" e consenso" e ao labor do Goberno central que dirixe Mariano Rajoy.