Un condutor bébedo intenta agredir en Ferrol os policías que lle deron o alto
Unha patrulla viuno de madrugada circulando por dirección prohibida e de forma temeraria. Cando lle deron o alto deuse á fuga ata que outra patrulla lle cortou o paso.
A Policía Local de Ferrol detivo esta fin de semana un home de 22 anos, veciño da cidade, que foi sorprendido "en severo estado de embriaguez" e conducindo de forma temeraria, tras o que se deu á fuga e tratou de agredir aos axentes.
Segundo informaron desde o Concello de Ferrol, o suceso ocorreu sobre as 2,00 horas da madrugada do sábado, cando unha patrulla observou como o vehículo que conducía o mozo realizaba unha manobra prohibida na intersección das rúas Terra e Igrexa, coa intención de acceder ao sentido contrario de circulación.
Tras seguilo un traxecto, os axentes comprobaron como o home circulaba de forma "temeraria" e non facía caso dos sinais de Stop que regulan as interseccións, obrigando os outros condutores a frear "bruscamente" e a "modificar a súa traxectoria para non chocar con el".
Ante esta situación, a Policía Local procedeu a darlle o alto, momento no que o mozo "emprendeu a fuxida ao volante cara á rúa Irmandiños", onde outra patrulla policial lle bloqueou o paso.
Con todo, o home respondeu entón de forma "agresiva" contra os axentes, que tiveron que sacalo do vehículo "pola forza" para proceder á súa detención e poñelo a disposición xudicial. O mozo circulaba cunha taxa de alcol superior a 60mg/l en sangue.
Escribe o teu comentario