​Yulimar Rojas, amiga da alma e eterna némesis de Ana Peleteiro

A venezolana, xa considerada como unha das atletas máis formidables de todos os tempos, é a gran rival da deportista galega.

Yulimar Rojas e Ana Peleteiro | Foto: EP

É indiscutible o talento de Ana Peleteiro. Os ouros nacionais, os metais europeos ou o bronce nas olimpíadas de Tokio consagrárona como unha das mellores na súa disciplina a nivel mundial e, indubidablemente, a mellor do deporte nacional. A de Ribeira ten o récord de España de triplo salto, cuns formidables 14 metros e 87 centímetros. Un voo histórico que, con todo, queda, cada vez máis lonxe, do récord do mundo, que posúe e amplía Yulimar Rojas.

O último voo da venezolana deixou a marca nun inalcanzables 15,74 m, o que a proclamou como campioa no Mundial de Belgrado hai dous días, un metro por encima da segunda clasificada. 

Son 7 cm máis que o seu salto de Tokio, cando tamén rompeu o récord mundial, e a súa terceira vez no alto do mundial de pista cuberta. Poderá superar a barreira dos 16 metros? A progresión, as condicións físicas e a mocidade de Yulimar, de 26 anos, fan imposible descartar nada.

COMO PIPPEN E JORDAN

Hoxe ninguén fai sombra a Rojas. Peleteiro sábeo e recoñéceo . Son 21 centímetros de diferenza no apartado físico, unha vantaxe substancial. Ademais, a suramericana é infalible no seu método de salto. Nunha entrevista, tras conquistar o bronce, Peleteiro admitiu que na súa disciplina as demais atletas saben que o máis alto do pódium está reservado para a venezolana, polo que as demais contendentes pelexan pola prata.

Rivais na pista, as dúas son grandes amigas e o abrazo no que se fundiron en Tokio unha vez que Yulimar fíxose co récord do mundo evidencia esa boa sintonía. Comparten adestramentos e paixón, pero Peleteiro ten a “desgraza” de coincidir con ela na historia. Ocorreu con Scottie Pippen e Michael Jordan, con Iniesta e Messi ou Yohan Blake e Usain Bolt.

A galega deuno toda esta fin de semana en Serbia, pero o seu salto apenas lle valeu para a oitava praza. Agora toca volver aos adestramentos e preparar os retos que quedan neste 2022, como o Mundial de Atletismo de Eugene, en xullo, ou o Europeo que terá lugar o próximo agosto.