Apetamcor, asociación de transportistas que apoia os paróns, nega vínculos políticos​ como os da Plataforma

Galiciapress conectou recentemente os fíos do tecido que conecta a Plataforma para a Defensa do Sector do Transporte de Mercadorías por Estrada Nacional e Internacional, colectivo que impulsa os paróns no sector que puxeron en xaque a economía, con partidos políticos e empresarios.

Desde Apetamcor, outra asociación galega que apoia as protestas, negan vínculos con "partidos" ou "correntes políticas", ademais de repudiar os actos vandálicos ocorridos esta semana. 

Folga transportistas | Foto: EP

A asociación de transportistas Apetamcor rexeita ter vínculos con "ningún partido ou corrente política", repudia calquera acto de vandalismo ou de violencia e insta o Executivo Central a negociar co sector.

A asociación quixo aclarar que "en vistas de certos bulos que circulan polas redes sociais e inclusive nalgúns medios de comunicación" a súa única misión é a representación dos seus socios e do transporte profesional.

Así mesmo, Apetamcor defendeu que o seu labor nestes momentos "críticos" que vive o sector do transporte profesional é loitar por "medidas xustas e condicións de traballo dignas" para os transportistas.

O colectivo instou ao Goberno para negociar as condicións, os servizos mínimos e unha solución "urxente" á situación que vive o sector. Ademais, puntualizaron que os transportistas non queren prexudicar a outros sectores como o gandeiro ou o lácteo, que ven afectados polo paro. Por iso quixeron transmitirlles que os transportistas son "vítimas" e que non queren facer dano.

Apetamcor reivindicou que se debe aos seus socios e que tan só cumpren co propósito de dar visibilidade ao sector e de transmitir á Federación Nacional (Fenadismer) a situación "límite" do colectivo.

En todo caso, insistiron en que é responsabilidade do Goberno Central lexislar en base ás reivindicacións do paro que levan a cabo os transportistas.