Falece un veciño de Vigo na estación de Baqueira, onde sufriu unha grave caída mentres esquiaba

Desde a estación catalá confirmaron a morte do galego, que viaxara desde a cidade olívica cuns amigos.

Baqueira | Foto: EP

A estación de esquí Baqueira Beret (Lleida) lamentou a morte dun esquiador o pasado xoves despois de quedar "gravemente ferido" ao sufrir unha caída nunha pista pechada a última hora da tarde.

Nun comunicado este sábado, a estación expresou a súa "máis sentido pésame" a familiares e amigos.

Tras ser rescatado e atendido polo equipo de pistas, o esquiador foi trasladado en helicóptero ao Hospital de Vielha (Lleida), onde faleceu ese mesmo día.

'Faro de Vigo' informara do accidente do esquiador e de que viaxara cun grupo de amigos desde Vigo ata a estación de esquí.