Que pasa en Otorrinolaringoloxía do CHUS? Sindicatos denuncian "caos organizativo"; "diferenzas internas" para Xerencia​

Os problemas destapados por CC.OO. na área de Otorrinolaringoloxía provocan que a propia Xerencia do hospital eleve a inspección a situación.

O sindicato advirte que a situación resulta "insostible" e desde o CHUS sinalan ao propio persoal do servizo como responsable.

Fachada do CHUS | Foto: EP

A Xerencia do Complexo Hospitalario Universitario de Santiago (CHUS) elevou a inspección a situación na área de Otorrinolaringoloxía do centro, que achaca a diferenzas internas rexistradas entre os profesionais do servizo.

Comisións Obreiras denunciou o "caos organizativo" e a "insostible situación" dese servizo, "con cargas de traballo moi desiguais para os distintos profesionais, tanto nos que respecta ás axendas como as intervencións cirúrxicas", entre outras cuestións.

Desde a Xerencia quixeron aclarar que "a calidade da atención sanitaria aos pacientes está garantida" e que a situación rexistrada débese a "diferenzas internas" producidas no propio servizo.

Así e tras diferentes reunións para tentar mediar, decidiuse elevar a situación á inspección.