​É posible o regreso a casa do fillo pródigo do Celta? Borja Iglesias, máis preto de Vigo que nunca

A necesidade do club galego en ataque e a do Betis nas súas contas fan posible a fichaxe do compostelán.

Xa a súa venda estivo acompañada de moita polémica, especialmente despois de ser un dos homes revelación do campionato no Espanyol e de facer historia na canteira celtiña comandando un Celta B lendario. A moitos non sentou ben a venda de Borja Iglesias ao Real Betis, un negocio do que os afeccionados se acordan cada vez que os seus saen ao campo coa pólvora mollada, un escenario que se repetiu moito desde a súa marcha. Pero agora, os camiños de xogador e club parecen próximos a cruzarse de novo, algo que celebra a parroquia de Balaídos.

O VESTIARIO ÁBRELLE A PORTA

E é que, segundo diversas informacións, todo parece indicar que este xaneiro existe a posibilidade de que Borja Iglesias regrese a casa polo Nadal. O Celta de Vigo, que non anda sobrado nin no aspecto ofensivo nin no económico, leva meses facendo malabares para buscar unha fórmula que lle permita fichar a un nove. Mandzukic soou con forza nunha operación realmente difícil polo caché do croata, ‘Toro’ Fernández podería ser o recambio de emerxencia se non sae ningunha outra opción, pero agora cobra forza o nome de Borja Iglesias.

O santiagués, que en Sevilla non ofreceu o rendemento que si deu en Barcelona e que mesmo o puxeron no punto de mira da Premier e da selección nacional, parece non contar para Pellegrini. En Heliópolis buscan desfacerse da ficha do nove para tentar abordar algunha fichaxe en canto se abra o mercado e poderían aceptar unha cesión, algo ao que si está disposto o Celta.

De feito, moitas voces xa comentan que o xogador xa mantivo conversacións con Hugo Mallo, capitán celeste, onde ambos sondaron a posibilidade de xogar xuntos este curso. De ser así, parece evidente que no vestiario abren a porta de pao a pao ao ‘Panda’, que garda moitos amigos en Vigo. Unha chegada que, doutra banda, tamén podería depender da continuidade de Pellegrini no cadro verdibranco, algo que parece en dúbida á vista dos resultados dos andaluces esta campaña.