Un cabalo choca contra un autobús de PSA Citroën provocando varios feridos graves

Unha vintena de persoas resultaron feridas a última hora deste martes nun accidente de tráfico sufrido por un autobús que transportaba traballadores de PSA Citröen aos seus domicilios e que envorcou ao seu paso por Oia (Pontevedra). Segundo a Garda Civil, polo menos 2 dos 22 pasaxeiros resultaron feridos graves.

En concreto, segundo fontes de emerxencias, o suceso tivo lugar pouco antes das 23,00 horas, no quilómetro 26 da estrada PO-552, que une Vigo coa Guarda, concretamente ao seu paso pola parroquia de Mougás.

UN ÉQUIDO NA ESTRADA

O sinistro orixinouse por un cabalo que invadiu a calzada. O condutor do autobús, da empresa ATSA, tratou de esquivalo sen éxito, e terminou atropelándoo, o que provocou que o vehículo envorcase.

No autobús viaxaban unha trintena de traballadores da planta viguesa de PSA, que regresaban aos seus domicilios tras terminar a xornada laboral. Segundo a información do 112-Galicia, a maioría dos pasaxeiros lograron saír polo cristal traseiro do vehículo polo seu propio pé

, polo que non foi necesaria a intervención dos Bombeiros de Baixo Miño, que foran alertados.

SETE FERIDOS DE CONSIDERACIÓN

Ata a zona si se desprazaron varias patrullas da Garda Civil e efectivos do GES da Guarda e de Val Miñor, co obxectivo de garantir a seguridade na zona. A circulación nese punto da estrada mantívose cortada ata esta mañá.

A maior parte dos feridos, os máis leves, foron trasladados nun autocar da mesma compañía ata o centro hospitalario de referencia, mentres que os que presentaban lesións de máis consideración, un total de sete, foron en ambulancias ata distintos hospitais.