A Caixa e a fundación María José Jove anuncian a apertura do prazo de inscrición para o programa 'Esforza verán'

As fundacións María José Jove e A Caixa abriron a inscrición para o programa 'Esforza verán', deseñado, segundo explican, "respectando as medidas oportunas de control e prevención da transmisión do Covid-19".

'Esforza verán' consta de vela, piragüismo e sendeirismo inclusivos e do servizo de axuda en praia. Os grupos serán máis pequenos, pero mantense a aposta das dúas fundacións "por facilitar a práctica do deporte a persoas con diversidade funcional".

A inscrición debe efectuarse a través da web www.fundacionmariajosejove.org e o prazo conclúe o próximo 19 de xuño.

As actividades de vela e piragüismo inclusivos desenvolveranse do 29 de xuño ao 18 de setembro en seis quendas no dique de abrigo de Mariña Coruña. A actividade de asistencia ou axuda en praia desenvolverase en Oza. A asistencia ofértase para xullo, agosto e setembro, cun máximo de seis persoas por grupo.

A actividade de sendeirismo inclusivo inclúe dous roteiros en domingo: a primeira programada para o 19 xullo e a segunda para o 23 de agosto. Hai 15 prazas por roteiro, que comezarán e finalizarán sempre nas instalacións da Residencia Rialta, na Zapateira.