​Naturgy apraza as facturas a pemes e autónomas por mor da crise do coronavirus

A enerxética puxo en marcha esta medida a partir das facturas que se emitan desde este momento “co obxectivo de que empresarios e emprendedores poidan facer fronte á crise do coronavirus e axudar a paliar o impacto nos seus ingresos”.

Naturgy, que vén á súa vez de presentar un plan especial que busca permitir a conciliación dos seus traballadores e contribuír a paliar o contaxio do virus, pretende con estas “iniciativas especificas” axudar aos seus clientes, afectados por esta crise que xa se está facendo notar na economía nacional.

“As facturas das pemes, micropemes, autónomos ou pequenos negocios como restaurantes ou barberías, que se acollan ao novo plan de axuda, poderán ser abonadas na segunda parte do ano. Naturgy farase cargo do custo destas facturas durante estes meses, financiando aos seus clientes a 6 meses sen intereses, e permitindo así flexibilidade o pago da enerxía”, informan desde a compañía. Desta iniciativa poderanse beneficiar, segundo as contas da enerxética, “ata 250.000 clientes, pemes ou autónomos”, dos cales 46.686 atópanse en Galicia.  

Francisco Reynés, presidente de Naturgy, destacou que “a orientación ao cliente da compañía queda demostrada neste tipo de accións rápidas que pretenden axuntar esforzos en momentos excepcionalmente adversos” e que as empresas teñen a obrigación de ser “conscientes” da súa responsabilidade para apoiar a contorna “en momentos conxunturais de alta incerteza”.