Ao Presidente de Naturgy Francisco Reynés comezan a saírlle os números, e de que maneira!, xa que cando acabe o ano poñerá á súa empresa en beneficios de 1.400 millóns de euros, abandonando o ronsel das perdas e ofrecendo ao accionista un panorama moi diferente ao 2018.

O seu plan estratéxico camiña con seguridade manifesta, e a marcha de REPSOL será ao final unha bendición para este xestor serio e eficiente que puxo Isidre Fainé á fronte do "vella" Gas Natural, coa evidente intención de que conseguise uns obxectivos moi próximos ao imposible.

Hoxe, aquela decisión tan arriscada transformouse nun acerto total, e a evidencia é que estamos ante un executivo de primerísimo nivel.

Reynés pormenorizounos aos xornalistas antes da celebración da Xunta que Latinoamérica -xunto a India e China- son os mercados que interesan polo seu enorme potencial de crecemento, aínda que Naturgy España levará máis da metade de investimentos previstos.

Loxicamente, o pastel das renovables saíu tamén a colación nas preguntas que se lle fixeron e, aínda que o primeiro xestor da empresa non quixo baixar ao rodo das cifras, estas poderían chegar aos 900 millóns de euros e deixar ante a competencia unha aposta firme e moi sólida.

Na información que lles envía a nosa Directora desde IFEMA en Madrid, poderán atopar mellores detalles dunha das Xuntas Xerais máis importantes da xornada económica deste día de Xuízos mediáticos e campaña electoral. Menos mal que os números de Naturgy sacáronnos do marasmo informativo no que nos atopabamos. Xa tocaba un respiro.