A matriz do Pastor condenada por vender a unha anciá preferentes como un investimento seguro

O Xulgado de Primeira Instancia Número 5 de Ourense e o Xulgado de Primeira Instancia Número 3 de Ponteareas condenaron ao Banco Popular a devolver máis de 28.000 euros a dous clientes con accións con bonos subordinados, participacións preferentes e accións de ampliación de capital de 2016 da entidade financeira.

No primeiro caso, segundo informou o avogado Juan José Pérez Barreiro, que levou ambos os casos, o director da entidade bancaria que comercializou unhas participacións preferentes --que se converteron posteriormente en bonos e finalmente en accións do Popular-- "declarou no xuízo que a iniciativa na comercialización deste produto partiu da entidade bancaria".

"Ofreceulle o produto á  cliente (unha septuaxenaria), a cal tiña un perfil ultraconservador. Así mesmo, o empregado bancario declarou que nin el nin os demais empregados do banco tiveron nunca ningún tipo de curso de formación especial para poder vender ese tipo de produtos", asegura o letrado.

APARENTABA SER SEGURO

Neste sentido, nun comunicado remitido aos medios, o avogado concretou que o maxistrado do Xulgado de Primeira Instancia Número 5 de Ourense, en sentenza do 22 de novembro de 2018, "concluíu que o banco comercializara eses produtos financeiros complexos ao seu cliente baixo a aparencia dun produto de aforro seguro".

Así mesmo, indica que "nunca se lles informou que a natureza real destes produtos era a duns produtos financeiros de altísimo risco", polo que condenou á entidade adevolver un total de 15.000 euros máis intereses e costas á afectada.

"Conclúese que non é crible que unha señora de case 80 anos, sen coñecementos financeiros e con perfil conservador, fose subscribir este tipo de contratos (que na súa orixe é perpetuo), máxime cando os folletos informativos entregados son incomprensibles para unha persoa sen uns coñecementos financeiros elevados", sinala o avogado.

AMPLIACIÓN DE CAPITAL EN PONTEAREAS

Doutra banda, o Xulgado de Primeira Instancia Número 3 de Ponteareas, en sentenza do 12 de decembro de 2018, declarou a nulidade da subscrición de accións da ampliación de capital do Banco Popular de 2016 e condenou á entidade para devolver ao cliente un total de 13.000 euros máis intereses e costas.

Juan José Pérez Barreiro aclarou que dita sentenza "entende que existen probas sólidas que apuntan a que a información que se facilitou ao accionista foi, como mínimo, gravemente inexacta", o que "implica que houbo un erro claro do consentimento", posto que "a información contable, os datos económicos relevantes e a situación de solvencia e económica que se forneceu ao accionista non era nin veraz nin real".

"Afírmase na sentenza que o Popular se baseou nun folleto informativo repleto de inexactitudes e erros contables, en supostos tan esenciais como os beneficios e as perdas da entidade, que nos levan a concluír, tras a publicación do informe emitido as Auditoras Delloite e PWC, polos peritos do Banco de España e do Banco Central Europeo, que se infrinxiu a Lei do Mercado de Valores, e que esa violación é a causa que motiva o erro no consentimento do investidor", destaca o letrado.

MÁIS SENTENZAS EN CONTRA DO POPULAR

Nesta liña, sinalou que ditas resolucións únense a outras dúas moi recentes --do Xulgado de Primeira Instancia Número 1 do Carballiño, do 8 de outubro de 2018; e do Xulgado de Primeira Instancia Número 1 de Vigo, do 2 de novembro de 2018--, que "condenan tamén a banco popular a devolver máis de 125.000 euros aos seus clientes pola comercialización indebida dos devanditos produtos".

Así as cousas, Juan José Pérez Barreiro sinalou que todas estas resolucións "sen dúbida poden considerarse como un raio de esperanza para os máis de 15.000 afectados en Galicia" - -máis de 300.000 a nivel estatal- - pola comercialización de bonos e accións do Banco Popular, "máxime cando continúa a polémica pola decisión da Xunta Única de Resolución da Unión Europea de adxudicar o Banco Popular Español (e o Banco Pastor) á entidade Banco Santander por só 1 euro".