A Fiscalía pide 16 anos de cárcere para a acusada de iniciar o menos 11 lumes forestais e 2016

Unha veciña de Cerceda (A Coruña) enfróntase a próxima semana a unha petición de ata 16 anos de prisión por supostamente provocar polo menos 11 incendios forestais prendendo lume con chisqueiros, papeis e velas aromáticas.

A Audiencia Provincial da Coruña fixou para esta xornada o xuízo no que se analizan varios incendios forestais ocorridos na zona durante o verán de 2016. En concreto, a muller é sospeitosa de provocar ata 15 lumes, aínda que a Fiscalía considera probada a súa participación en 11.

Segundo recolle o escrito de acusación de Fiscalía, o termo municipal de Cerceda rexistrou entre mediados do mes de xullo e o 12 de agosto dese ano unha serie de incendios forestais que afectaban a un radio de aproximadamente tres quilómetros e que "se producían sempre nas mesmas franxas horarias", ben á primeira hora da mañá ou da tarde.

A Garda Civil centrou desde o primeiro momento as súas sospeitas nunha veciña da zona, M.C.G.G, que realizaba diariamente desprazamentos por esta área para levar ao seu marido ao traballo, nunha gasolineira, onde alternaba a xornada de mañá coa de tarde. Os investigadores detectaron que a orixe dos lumes coincidía con estes desprazamentos.

POLO MENOS 11 LUMES
No escrito de fiscalía detállanse varios lumes que, segundo indica, "se constatou" que produciu a acusada, valiédose para iso do seu vehículo e de chisqueiros, ver e papel que levaba no seu coche.

En concreto, indica dous focos de pequeno tamaño orixinados na zona de Portofranco o día 12 de agosto de 2016, sobre as sete horas, que se produciron con poucos minutos de diferenza e separados por 140 metros. Un veciño da aldea foi o que viu as columnas de fume e apagou os lumes.

A continuación, o mesmo día, Fiscalía considera probado que a muller se desprazou ata as proximidades dunha nave propiedade do Concello de Cerceda e deixou unha vela acesa nun piñeiral próximo. Neste caso foi un empregado municipal o que observou o fume e procedeu a apagalo.

Finalmente, o Ministerio Fiscal narra que a acusada se desprazou despois ata a Vila Deportiva Fernando González Laxe, onde "plantou lume" en seis parcelas utilizando o sistema das velas aromáticas para "retardar a propagación" das chamas e que puidese "afastarse" da zona. Estes lumes queimaron case 5.000 metros cadrados de arboledo e foi necesaria a actuación de servizos de extinción da Xunta.

Ademais, nas proximidades, a muller está acusada de plantar outros dous focos que, aínda que non chegaron a estenderse, atopábanse "a escasos metros dunha vivenda unifamiliar habitada".

No momento da súa detención, que tivo lugar nas inmediacións do último lume, a Garda Civil localizou no seu poder cinco velas aromáticas máis, ademais de mistos, papel e nove chisqueiros.

RISCO EXTREMO
Durante eses días, lembra o escrito de fiscalía, houbo en Cerceda temperaturas máximas que chegaron ata os 33 graos e unha humidade por baixo do 30%, así como fortes ventos, polo que a zona presentaba "un risco de incendios extremo", circunstancia que foi "aproveitada" pola procesada.

O Ministerio Público considera á acusada responsable de un delito continuado de incendio forestal con perigo para a integridade física das persoas, polo que pide unha pena de 16 anos de prisión. En caso de non considerarse acreditado o risco para as persoas, reclama que sexa condenada a 6 anos de cárcere. Ademais, insta o comiso do seu vehículo e pide unha indemnización de 828 euros á Xunta polos gastos de extinción.