Rueda reclama "seguir negociando sen manter unha folga indefinida"
O vicepresidente insiste en que a súa oferta é a última. "Aí nos imos manter", remarcou.
O vicepresidente da Xunta, Alfonso Rueda, defendeu este mércores que a Administración galega está aberta a falar para tentar reconducir o conflito na xustiza en calquera momento, pero remarcou que a base da negociación será a última oferta que o luns o Goberno deixou sobre a mesa e manifestou o seu desexo de que os sindicatos "entren en razón".
Rueda, quen xa apelou esta semana a que se levante o paro iniciado o mércores da semana pasada, insistiu en que "se pode seguir negociando sen manter unha folga indefinida". Engadiu, ademais, que para negociar "hai que facer algo máis que cualificar de ridícula unha subida que pode chegar aos 1.000 euros ao ano".
Con esta postura por parte dos sindicatos, advertiu que non se vai chegar "a moitos puntos de acordo", aseverou, antes de reiterar que "isto non é un toma e daca para ver quen sobe máis e ata onde chegamos".
"Ata onde chegamos é á cifra ofertada e aí nos imos manter", remarcou.
NOVA REUNIÓN?
Acerca de se hai previsto algún novo encontro ou contacto entre Xunta e comité de folga, o vicepresidente remarcou que o Goberno galego nunca pechou as portas para falar. "Hoxe mesmo, ou mañá, se queren", esgrimiu.
"As datas (para o diálogo) son todos os días que os sindicatos queiran", asegurou, antes de precisar que esta disposición non significa que a Xunta "vaia a estar a subir sempre a cifra".
Escribe o teu comentario