​Rajoy: "Esa dor, que é permanente, por desgraza non é revisable"

A presidenta da Junta de Andalucía, Susana Díaz, criticou este luns que o presidente do Goberno, ao fío do debate sobre a prisión permanente revisable, estea a utilizar a "dor e o sufrimento" das familias.

En declaracións a TVE recollidas por Europa Press, Susana Díaz indicou que, máis aló do debate en si, que ten moita profundidade e connotacións, e tendo en conta ademais que hai penalistas que expoñen dúbidas sobre se o mantemento desa figura é compatible ou non coa Constitución, ela ten claro que nunca utilizaría a "dor" das familias. "Para iso hai que valer e eu non valería para iso", recalcou.

CLAVE ELECTORAL

Pola súa banda, Pablo Iglesias, volveu insistir no seu rexeitamento á prisión permanente revisable pero di que entende as familias das vítimas de "asasinatos espantosos" cuxo "sentimento é perfectamente comprensible".

Así o afirmou o líder de Podemos, en 'El Objetivo' de La Sexta. "É un sentimento perfectamente comprensible pero desprezo que quen sabe de dereito utilicen este tema en clave electoral", indicou Iglesias sobre este tema de actualidade tras o caso de Diana Quer, cuxa familia logrou dous millóns de firmas para que se manteña esta pena.

"Non estou a favor da pena de morte, da cadea perpetua", deixou claro o líder dos 'morados', que afirmou que "habería que normalizar que haxa referendo por moitas cousas", por exemplo, o de derrogar ou non esta reforma.

A DOR NON É REVISABLE

Susana Díaz e Pablo Iglesias referíronse ás palabras do domingo de Rajoy, que clausurou en Córdoba a Convención Sectorial do PP sobre a Prisión Permanente Revisable.

Alí, ante os seus, o presidente dixo entender "que algúns discrepen da prisión permanente revisable, e están no seu dereito, pero a maioría dos españois saben que o que é permanente é a dor dunha nai ou dun pai dun menor asasinado, ou o dun fillo vítima do terrorismo, e esa dor, que é permanente, por desgraza non é revisable".

Ademais, Rajoy sinalou que esta pena "é proporcionada aos crimes que castiga e está en sintonía co que prevén todas as democracias europeas da nosa contorna". A iso súmase que "hai unha amplísima maioría de españois que defende esta medida", asegurou, en liña coa campaña lanzada polos populares para solicitar apoios por toda España.

É máis, o presidente do Goberno anunciou a intención de que se amplíe a aplicación da prisión permanente revisable a máis delitos, tendo en conta que en Francia se aplica a 26, en Alemaña a 20, en Italia a 19, e en España a oito delitos.

Por iso é polo que agora o PP quere ampliar a súa aplicación a "aqueles casos agravados, nos que o delito causa, non só un dano permanente e irreparable, senón que provoca un sufrimento engadido aos familiares da vítima".