O colectivo de actores e actrices de dobraxe en Galicia dixo "até aquí". A asociación Artistas da Dobraxe Asociados (ADA) reclama o cumprimento salarial do convenio para o sector, un convenio do ano 2006 que ademais de non ser renovado en case vinte anos, tampouco se cumpre no relativo a remuneracións. Tras corenta anos con experiencia en dobraxe, Galicia xa ten unha infraestrutura montada capaz de dar resposta ás demandas do audiovisual propio e doutras partes de España.