Derrubadas as últimas chabolas na Pasaxe (A Coruña) no medio dun gran despregamento policial
Hai anos que a Xustiza ordenou o desaloxo, pero polo menos unha familia permanecía até hai pouco no poboado, derruído esta mañá. A alcaldesa Inés Rey congratúlase por pechar este capítulo de infravivenda na cidade tras 40 anos. A zona foi foco de conflito, a miúdo ligada co marisqueo ilegal.
Efectivos policiais, tanto da Policía Nacional como da Local, participan desde primeira hora deste xoves nun dispositivo para proceder ao desaloxo no asentamento chabolista da Pasaxe, na Coruña, co obxectivo tamén de demolición das estruturas existentes.
Trátase dunha actuación a instancias da Dirección Xeral de Costas e en base a un medida xudicial para o desaloxo, segundo informaron fontes próximas ao caso consultadas por Europa Press. As administracións prevén construír alí unha senda verde para unir a cidade da Coruña co paseo do Burgo.
O desaloxo produciuse no marco dun operativo con presenza de persoal municipal e de equipos para retirar os materiais existentes na zona despois de que concluíse o prazo legal para que o último ocupante abandonase o poboado. Por agora, non hai constancia de incidentes. Todos os inmobles foron derruidos. Aproveitouse a actuación para tirar tamén un inmoble ilegal debaixo do CHUAC.
No poboado chabolista da Pasaxe, e despois de que se procedese con anterioridade ao reacollo de familias que vivían nel, próximo á ría do Burgo, só residía xa unha persoa, que hoxe non se atopaba alí, aínda que si os seus fillos. Durante décadas, as chabolas serviron de refuxio a persoas que ás veces se dedican ao furtivismo de ameixa e marisco na costa coruñesa.
Escribe o teu comentario