Pillado conducindo un tractor con só 15 anos e coa súa nai de copiloto no Barbanza
Investigan ao mozo por un delito contra a seguridade viaria e á súa nai como cooperadora necesaria.
O Subsector de Tráfico da Garda Civil da Coruña investiga a un menor, de 15 anos, por un delito contra a seguridade viaria e á súa nai como cooperadora necesaria.
Segundo informou o Instituto Armado, os feitos sucederon cando compoñentes do Destacamento de Tráfico de Santiago de Compostela, que realizaban labores de vixilancia da circulación, observaron un vehículo agrícola circulando por unha das vías secundarias da comarca do Barbanza.
O condutor aparentaba ter unha idade inferior á mínima requirida para a obtención do permiso de condución, polo que os axentes detiveron a marcha do vehículo.
Desta forma, identificaron aos ocupantes e comprobaron que o condutor tiña 15 anos e ía acompañado pola súa nai situada á beira do posto de condución.
Por todo iso, a Garda Civil investigou ao condutor como presunto autor dun delito contra a seguridade viaria que leva penas de prisión de tres a seis meses ou multa de 12 a 24 meses e traballos en beneficio da comunidade de 31 a 90 días e á súa nai como presunta autora dun delito de cooperadora necesaria.
Escribe o teu comentario