Accidente mortal en Ribeira: morre un home ao envorcar o seu tractor en Oleiros
Os feitos ocorreron este martes, ao redor das 13:50 horas, no lugar de Salmón, pertencente á parroquia ribeirense de Oleiros.
Un home faleceu na tarde deste martes no municipio coruñés de Ribeira ao resultar esmagado polo tractor que manexaba nunha leira do lugar de Salmón.
O sinistro produciuse ás 13,50 horas deste martes no lugar pertencente á parroquia de Oleiros, segundo trasladou o Centro Integral de Atención ás Emerxencias 112 Galicia.
Tras recibir a voz de alarma a través dunha chamada telefónica, o 112 activou un dispositivo que implicou a mobilización do helicóptero de Urxencias Sanitarias 061, desprazado até o lugar pero que non puido facer nada pola vida do falecido.
A vítima quedou atrapada baixo o vehículo agrícola e foi necesaria a intervención dos veciños para poder liberalo, polo que non foi necesaria a intervención dos bombeiros de Boiro.
Escribe o teu comentario