Nin un paso atrás dos bombeiros de Ourense, que manteñen a folga indefinida tras reunión coa Deputación

A folga indefinida dos bombeiros do Consorcio Provincial de Ourense, iniciada o pasado sábado 11 de abril, continúa activa despois de que o encontro celebrado este luns entre o comité de empresa e representantes políticos e técnicos da Deputación non lograse desbloquear o conflito. Así o confirmou a Europa Press o presidente do comité, Roberto Fernández, quen sinalou que a reunión serviu para constatar que a Intervención provincial —o brazo técnico da administración que os políticos puxeron como argumento— carecía de información suficiente sobre o asunto.

Segundo Fernández, os bombeiros están agora á espera dun informe técnico de Intervención que podería chegar ao longo desta semana. En función do seu contido, o comité determinará como orientar as súas próximas accións. O que si deixou claro é que a folga continuará mentres non se resolva o problema de fondo. As principais queixas do consorcio apuntan a un persoal insuficiente, á cobertura habitual de quendas mediante horas extraordinarias e ao incumprimento do convenio colectivo asinado en 2024 tras as mobilizacións de 2023.

O conflito arrastra xa un longo historial. Os traballadores levan tres anos de mobilizacións desde as primeiras protestas, e aínda que aquel pulso acabou coa firma dun convenio en 2024, consideran que ese acordo quedou en papel mollado. 

Ademais, o comité denuncia que a Deputación mantén bloqueada a aplicación do IPC de 2025 e debe gardas dese mesmo ano sen abonar. 

UN SERVIZO Ao LÍMITE EN VÉSPERAS DO VERÁN

A gravidade da situación queda en evidencia nos propios parques. A bolsa de interinos creada para cubrir baixas apenas conta con tres persoas activas para todo o Consorcio, insuficientes para responder as necesidades actuais.

O contexto é especialmente delicado: a folga prodúcese ás portas do verán, tras un ano marcado por algúns dos incendios máis devastadores que se lembran na provincia, con especial impacto en comarcas como Valdeorras.

O BNG xa levou o asunto ao Parlamento galego: o deputado Iago Tabarés rexistrou unha iniciativa parlamentaria para esixir á Xunta e á Deputación que asuman responsabilidades, incrementen o persoal e desbloqueen o conflito laboral. 

A DEPUTACIÓN DEFENDE A súa XESTIÓN

O presidente da Deputación de Ourense, Luís Menor, compareceu ante os medios para rebater as acusacións e reivindicar o traballo realizado desde que se constituíu o consorcio. Sinalou que se pasou dunha xestión indirecta a unha directa, que os traballadores adquiriron a condición de empregados públicos fixos, que as gardas foron reducidas de 73 a 67 horas, que o persoal creceu un 27% e que existe unha bolsa de contratación operativa con 17 novas prazas en proceso.

Menor recoñeceu que poden quedar aspectos por corrixir, pero negou categoricamente calquera incumprimento flagrante ou inacción por parte da institución provincial.

O presidente provincial subliñou que as discrepancias teñen na súa maioría unha base económica e apelou ao traballo xa realizado. Con todo, desde o comité de empresa négase que os compromisos económicos e de persoal estean a cumprirse na práctica, e os bombeiros advirten de que cada día sen solución deteriora aínda máis un servizo que, segundo denuncian, leva meses funcionando practicamente no límite da súa capacidade operativa. A Xunta de Galicia, que comparte xunto á Deputación a titularidade do consorcio ao 50%, non se pronunciou publicamente sobre o conflito.