Rusia tamén "invade" augas galegas: a fragata Shtandart viola as augas territoriais españolas

Con media Europa coa vista no ceo polas cada vez máis constantes incursións de aparellos rusos en espazo aéreo de Estados pertencentes á OTAN, como Polonia ou Estonia, agora é a vía marítima a que inquieta noutros lugares como España, onde foi avistado o buque ruso Shtandart, unha fragata que non ten acceso a portos da Unión Europea como ordenou o Tribunal Xeral.

PASO POR GALICIA

Este buque escola, réplica dun navío do S.XVII, trazou unha ruta desde Francia e pasou ante A Mariña lucense ou a ría de Ferrol, entrando en augas baixo dominio español. A plataforma 'Non Shtandart In Europe' advirte que este feito supón unha "violación das augas territoriais". 

O buque ruso, baixo sancións, viaxa baixo pavellón das Illas Cook. A organización, en cambio, considera que as actividades do barco "presentan numerosas similitudes coas dos buques da “flota pantasma” rusa". Non é a primeira vez que fondea na comunidade galega, de onde foi expulsado o pasado ano. 

"Resulta evidente que o seu capitán e propietario de feito, Vladimir Martus, tenta novamente pór a proba a solidez das sancións europeas e a determinación de España de facer respectar as súas propias decisións", esgrimen desde o colectivo, que aventura a posibilidade de que pidan entrada en portos españois alegando motivos humanitarios. 

O contexto, con todo, é moito máis espiñento. Desde o propio Shtandart negan calquera vinculación co Goberno de Putin e dinse, mesmo, obxectivo do Kremlin. "O noso barco e a tripulación nunca foron parte de ningunha propaganda rusa. De feito, o barco e a súa tripulación foron efectivamente prohibidos en Rusia por persoas próximas a Vladimir Putin fai 10 anos. STS Shtandart nunca entrou en augas territoriais rusas desde entón, sendo obrigado a vivir no exilio", declarou a Galiciapress  o capitán Vladimir Martus alá por 2022, cando comezou a guerra en Ucraína.

As protestas de refuxiados ucraínos e as tensións existentes neste momento con Rusia na UE e a OTAN poden facer máis difícil a travesía do Shtandart e a súa tripulación, que se dirixe, aparentemente, cara ao Estreito de Xibraltar.