A DGT inicia o luns en Galicia unha campaña sobre o uso do cinto e retención infantil
O obxectivo desta campaña é concienciar sobre a importancia do uso dos sistemas de retención homologados, xa que, segundo os últimos datos da DXT, en Galicia o 51% dos falecidos en turismo no 2023 non facían uso do cinto
A Dirección Xeral de Tráfico (#DXT) inicia desde este luns unha campaña especial de control e vixilancia sobre o uso do cinto de seguridade e retención infantil que se estenderá até o vindeiro domingo 17 de marzo.
O obxectivo desta campaña é concienciar sobre a importancia do uso dos sistemas de retención homologados, xa que, segundo os últimos datos da DXT, en Galicia o 51% dos falecidos en turismo no 2023 non facían uso do cinto.
Na provincia da Coruña, a cifra elévase ao 57%. Para a Delegación do Goberno, estes datos son especialmente preocupantes porque o seu uso "reduce á metade o risco de falecemento en caso de accidente e nun 77% en caso de envorcar o vehículo".
Así mesmo, sinala que a capacidade de protección do cinto é igualmente efectiva respecto de todos os ocupantes, pasaxeiros que viaxen nos asentos dianteiros e tamén nos traseiros.
Na mesma campaña do ano pasado, a DXT controlou 68.016 turismos en Galicia, dos cales 931 foron denunciados. En total, dos 76.755 vehículos controlados (autobuses, turismos, taxis e de mercadorías), 1.096 resultaron infractores.
Escribe o teu comentario