FACUA Galicia denuncia a Ambulancias Rías Baixas por ter un 902 como teléfono de urxencias
A asociación informou aos usuarios de que poden reclamar á empresa o que se lles cobrou polas chamadas realizadas
FACUA Galicia denunciou a Ambulancias Rías Baixas ante o Instituto Galego de Consumo e Competencia por ter un número 902 para atender as urxencias. Trátase dun teléfono cuxas chamadas son de tarifación especial, dispoñible pola empresa 24 horas.
A asociación remitiu un escrito a este organismo oficial pedíndolle que inste a Ambulancias Rías Baixas a eliminar este número de tarifación especial iniciado en 902 e que habilite un gratuíto.
FACUA Galicia informou así mesmo aos consumidores que se vexan obrigados a chamar á empresa a través deste número de teléfono de que poderán reclamarlle á mesma o abono das cantidas que se lles cobrou.
A LEXISLACIÓN
O artigo 21 do Real Decreto Lexislativo 1/2007, do 16 de setembro, polo que se aproba o texto refundido da Lei Xeral para a Defensa dos Consumidores e Usuarios recolle, xunto con outras leis complementarias, que "nos supostos servizos de carácter básico de interese xeral, as empresas prestadoras dos mesmos deberán dispoñer, en calquera caso, dun teléfono de atención ao consumidor gratuíto".
Segundo esta norma, considéranse "servizos de carácter básico de interese xeral os de subministración de auga, gas, electricidade, financeiros e de seguros, postais, transporte aéreo, ferroviario e por estrada, protección da saúde, saneamento e residuos, así como aqueles que legalmente se determinen".
O emprego de teléfonos de tarifación especial para a prestación dos servizos de atención ao cliente constitúe un obstáculo ao exercicio do dereito para reclamar por parte dos consumidores e usuarios.
Escribe o teu comentario