Ana Pontón volve tender a man do BNG para alcanzar "grandes acordos de país"
"Nós estamos en política para pór no centro ás persoas e desexámoslle o mellor ao país", manifestou a portavoz do BNG
A portavoz nacional do BNG, Ana Pontón, desexou "acertos" ao presidente da Xunta, Alfonso Rueda, que toma posesión este sábado, e volveu a tender a man do Bloque para chegar a "grandes acordos de país".
En declaracións aos medios antes do acto, que se celebra no parque de San Domingos de Bonaval, Pontón recoñeceu que é "evidente" que ambos teñen "moitas discrepancias políticas", pero manifestou que "os seus acertos redundarán no beneficio de Galicia". "Para o BNG o primeiro é este país, os galegos e as galegas", aseverou.
Así, volveu tender a man ao líder do PPdeG para que poidan alcanzar "grandes acordos de país". En concreto, mencionou a defensa da sanidade pública, o dereito á vivenda e "para que haxa unha rexeneración democrática" e Galicia "avance".
"Para ir nesa dirección sempre pode contar o próximo Goberno coa man tendida do BNG. Nós estamos en política para pór no centro ás persoas e desexámoslle o mellor ao país", manifestou.
Escribe o teu comentario