Miguel Míguez, novo secretario xeral do Partido Galego

O pleno do congreso do Partido Galego (PG) aprobou por unanimidade a elección de Miguel Míguez como secretario xeral da formación e de Francisco Villanueva como presidente.

Nunha nota de prensa, o Partido Galego destacou que se trata de dúas persoas con "moita bagaxe política, social e no mundo profesional". En concreto, detallou que Villanueva desenvolve o seu labor no ámbito sanitario e Míguez no ámbito empresarial da acuicultura.

No discurso de clausura do congreso, o novo secretario xeral expresou a intención de levar a cabo un "intenso traballo" orgánico para a expansión e implantación do PG no maior número posible de concellos, así como a incorporación de activos políticos para a transformación e posta en práctica de "boas políticas nas corporacións locais e no ámbito autonómico".

O Partido Galego tamén aprobou os membros permanentes do seu Consello Nacional e os documentos de resolucións (12), tese política, liña estratéxica e estatutos.