"Parado por obras": traballadores da construción chamados á folga o día 5 contra "salarios indignos"
A CIG, convocante da folga, esixe á patronal galega que sente a negociar un convenio autonómico para acabar con xornadas "de máis de 10 horas".
Uns 80.000 traballadores galegos da construción están chamados á folga o vindeiro mércores día 5 para denunciar a presenza de "salarios indignos" e xornadas "de máis de 10 horas" no sector, para o que a CIG reclama negociar un convenio autonómico que cambie estas circunstancias.
En rolda de prensa, o portavoz da federación da construción da central nacionalista, Plácido Valencia, advertiu de que "hai que gritar alto e claro" por unha mellora nas condicións laborais dos traballadores da construción en Galicia, ante un sector "machucado e precarizado" e "atado" polo que indica a patronal e o convenio estatais.
Cunha representatividade na comunidade que sitúan en torno ao 35-40%, a CIG carga contra a "intransigencia" da patronal galega, coa que leva "máis dun ano tentando reunir", e incide en que "non pode ser" que os convenios provinciais, que son os que se aplican, "estean sempre atados" polo que di Madrid.
Por iso convocan unha xornada de paro, lembrando a que se produciu hai décadas en todo o país, e ante a que consideran que as organizacións estatais, CC.OO. e UXT, "van ter que retratar" en Galicia.
MÁIS DE 10 HORAS
Acompañado por representantes das distintas comarcas, Plácido Valencia censurou a existencia de salarios "indignos" e "xornadas de máis de 40 horas semanais". "Que non veñan con milongas", avisou, para asegurar que "o 100% dos traballadores fan horas extras e moitas delas nin se pagan".
De feito, afirmou que "a inmensa cantidade dos traballadores" do sector "fan máis de 10 horas", e non en empresas pequenas, senón "nas grandes e nas obras públicas". Por iso é polo que a CIG se propoña con esta folga e mobilizacións que xa estudan "dar unha volta a todo o sector".
Escribe o teu comentario