UGT rexeita o novo convenio da limpeza de Lugo e cre que é "un desastre" para o sector
UGT sinala que é "lamentable que en pleno século XXI algunhas organizacións sigan separando as condicións laborais dependendo do xénero"
A Federación de Servizos Mobilidade e Consumo UGT de Lugo rexeita as condicións do novo convenio da limpeza na provincia de Lugo tras o acordo asinado pola CIG.
Nunha nota de prensa, o sindicato afirma que se desmarca totalmente dese acordo, xa que consideran que supón "un retroceso" nas condicións laborais de todas as persoas traballadoras do sector. "Non só está por baixo do SMI (Salario Mínimo Interprofesional), senón que, ademais, deixa moi en dúbida a igualdade de dereitos de todas as persoas traballadoras", expón.
Así, UGT sinala que é "lamentable que en pleno século XXI algunhas organizacións sigan separando as condicións laborais dependendo do xénero".
Para UGT, a CIG "demostra ser un sindicato de xénero e non de persoas". "A súa falta de empatía coas mulleres deixa ao sector de limpeza cunhas condicións moi precarias, sendo o peor convenio de España, sen dúbida", censura.
Segundo detalla o sindicato, este 2024 os profesionais do sector da limpeza cobrarán no cómputo anual 15.014,29 euros, "sendo esta contía claramente inferior ao SMI en vigor".
Ademais, reprocha que "no art 10 do acordo atrévense a garantir ás persoas traballadoras o SMI vixente en cada momento". "A CIG alardea de tal logro en toda a prensa, menosprezando a intelixencia das persoas traballadoras. E temos que deixar claro que o SMI o garante o Goberno, non a CIG", asevera.
Escribe o teu comentario