Yulenmis I de España! A lanzadora estará en París 2024 tras lograr a nacionalidade
A atleta, que se prepara en Galicia para a cita de París, xurará a Constitución nos próximos días.
É a mellor no seu, pero a burocracia apartáraa das grandes citas con España...até agora. Anos de adestramento en Galicia, onde se prepara baixo a atenta mirada de Raymundo Fernández, esperando por unha nacionalidade que non chegaba. Finalmente, foi por carta de natureza que o Goberno de España concedeulle a nacionalidade a Yulenmis Aguilar, que por fin poderá lanzar baixo a bandeira de España.
"Eu vou aos Xogos Olímpicos por España ou non vou", declaraba hai uns meses a Galiciapress . As aspiracións da lanzadora de xavelina, coa mellor marca mundial do ano, víronse colmadas tras o anuncio de Pilar Alegría, ministra de Deportes, encargada de trasladar a noticia acordada no Consello de Ministros.
Desde Oleiros traballa incansablemente para cumprir o soño que a trouxo do seu Cuba natal para perseguir o soño de subir ao podio olímpico. Ten aínda a marca do mundo sub-20 con 63,86 metros e a súa mellor marca está nos 64,17 metros. O seu teito parece aínda lonxe e este verán ten unha oportunidade de ouro para facer historia.
En Galicia ten establecida a súa vida e está máis que integrada nun territorio do que só ten boas palabras: "É o lugar perfecto para adestrar porque o ten todo: ten a praia, as montañas para a preparación...". Toda a comunidade alentaraa en agosto para perseguir o ouro olímpico. O soño está un pouco máis cerca.
Escribe o teu comentario