Manuel Otero Martínez, Celso Mosteiro e Abel Faraldo, galegos que combateron por EE.UU. na II Guerra Mundial

Os galegos, Manuel Otero Martínez, Celso Mosteiro e Abel Faraldo, combateron durante a Segunda Guerra Mundial no exército estadounidense, segundo apuntan varios estudos nos que participou o profesor da Universidade de Santiago de Compostela (#USC), Javier Fernández Castroagudín.

Tal e como trasladou a USC nunha nota de prensa, o artigo titulado 'Un emigrante galego alistado no exército estadounidense durante a segunda guerra mundial. O caso de Manuel Otero Martínez', publicado en Cadernos de Estudos Galegos e en colaboración coa Asociación GRH Big Rede One 'Manuel Otero', aborda como a emigración "constituíu para Galicia un sinal de identidade e un elemento histórico-cultural de primeira magnitude".

Desta maneira, preséntase a Manuel Otero, natural de Outes e emigrado a Estados Unidos no ano 1941, menos de dous meses antes da entrada do país de na Segunda Guerra Mundial, "foi actor e testemuño de circunstancias históricas verdadeiramente extraordinarias".
 

A pesar da súa profesión previa de mariñeiro, o seu traballo en Estados Unidos estivo relacionado coa construción. Posteriormente, foi recrutado e adestrado, iniciando os trámites para obter a nacionalidade estadounidense.
 

Pola súa banda, o estudo titulado 'Españois na Segunda Guerra Mundial: a última misión do first lieutenant Celso Mosteiro', céntrase na figura destoutro galego que con 24 anos foi rexistrado no primeiro chamamento, o 16 de outubro de 1940, no Local Board n.º2 de Nova York.

Mosteiro Correa naceu na Coruña o 21 de setembro de 1916. Tras o estalido en España da Guerra Civil, decidiu emigrar con 20 anos aos Estados Unidos e desapareceu na guerra nun accidente de aviación.
 

Finalmente, o estudo 'Uncommon valor: Abel Faraldo, un emigrante galego no corpo de marines dos Estados Unidos durante a Segunda Guerra Mundial', pon en valor a figura deste galego, nacido en Galicia, e que se alistou no Corpo de Marines en 1942, asignado ao seu 4.ª División, coa que participou nos asaltos anfibios de Roi-Namur, Saipan, Tinian e Iwo Jima, onde resultou gravemente ferido.