Estas son as actividades infantís que as cidades galegas ofrecen este Nadal

A Coruña acollerá este sábado a visita especial de Papá Noel, entre as 11:00 e as 13:00. Ademais, a partir das 10:00 e até as 15:00 haberá un espazo de dinamización infantil no barrio de Novo Mesoiro.

Pola súa banda, o Concello de Ourense inaugura este venres Ourendal, un novo parque do Nadal na rúa Álvarez de Sotomayor, preto da Igrexa de Fátima no barrio do Couto. Ourendal, deseñado para revitalizar o ambiente festivo e ofrecer entretemento aos residentes, inclúe atraccións como unha recreación da casa de Papá Noel en Laponia e o Reino de Oriente dos Reis Meigos.

En Lugo , a Praza Maior contará co seu xa habitual mercado de Nadal. Nel haberá multitude de actividades para nenos e nenas entre os que destacan un microespectáculo do Nadal, un contacontos ou un espectáculo de maxia. A alcaldesa de Ourense subliñou que con este mercado búscase "crear un ambiente festivo e acolledor, que contribúa á promoción da cidade e a atraer visitantes doutras zonas de Galicia".

Santiago, pola súa banda, converterá o Multiusos Fontes do Sar nun gran parque de atraccións de 3.500 metros cadrados. Nel, haberá unha programación diaria na que se sumarán actuacións, exhibicións e talleres especiais.

Unha pista de xeo e un bosque de Nadal son algunhas das actividades que trae Pontevedra para os máis pequenos durante este Nadal . O alcalde indicou que se trata da primeira vez que hai na cidade do Lérez unha pista de xeo ao aire libre. Haberá tamén tirolina, tobogán e unha carpa con xogos montesori para nenos e nenas.

Tamén Vigo contará coa presenza dos Reis Meigos e Papá Noel este nadal. Os máis pequenos poderán reunir con eles até o 24 de decembro.