Alumnos de colexios galegos participan na recollida de pilas da man de 'Pilabot'

A Xunta de Galicia deu o pistoletazo de saída á cuarta edición do concurso 'Pilabot' en 150 centros de ensino galegos, co obxectivo de concienciar aos máis novos da importancia que ten a reciclaxe de pilas.

O certame, que foi posto en marcha pola Consellería de Medio Ambiente en colaboración cos xestores autorizados na comunidade, Ecopilar, ERP e Ecolec, busca fomentar a reciclaxe deste tipo de residuos entre a comunidade escolar e entre as familias do alumnado. Ao mesmo tempo facilítase información e recursos didácticos para promover actitudes positivas que preveñan os problemas de contaminación que poden ser derivados si non se xestionan de forma axeitada.

Os centros competirán entre si ao longo de seis semanas lectivas para conseguir as mellores cifras de recollida de pilas, ademais de acumulador e baterías en desuso. Estes son os residuos máis contaminantes que se xeran nos fogares.

Desta maneira, os catro centros gañadores repartiranse 7.500 euros divididos en catro premios. Deles, dous serán 2.500 euros. Un será para o centro que máis quilos recupere e o outro, para o que teña mellor taxa de recollida por alumno. Os outros dous, de 1.250 euros serán para os segundos clasificados nas anteriores categorías. Os premios deberán destinar, en calquera caso, á compra de material escolar e deportivo ou a organizar actividades educativas.

Tamén está prevista, paralelamente, a realización de talleres educativos no medio centenar de colexios participantes, como xa ocorreu na edición anterior. O obxectivo será pór en valor a importancia das pilas na vida diaria das persoas, facendo fincapé na necesidade de garantir a súa correcta reciclaxe e implicar ao conxunto da comunidade educativa destes centros na campaña.

Paralelamente, tamén se celebrará unha nova edición do concurso artístico '#Eusonpilabot', que está dirixido á totalidade do alumnado dos centros participantes. O próximo día 23 de febreiro abrirá o prazo de incripción. Para participar será necesario enviar unha obra artística en formato imaxe, xa sexa un debuxo, unha fotografía ou un mosaico, inspirada na reciclaxe de pilas e orientada aos Obxectivos de Desenvolvemento Sostible 2030 da #ONU.