Varios empresarios detidos polo accidente mortal dun inmigrante irregular en Carballo

A Garda Civil detivo a tres persoas por mor da morte dun operario nunha empresa do polígono de Bértoa, en Carballo (A Coruña), o pasado 26 de febreiro. O home carecía da protección axeitada e do permiso legal para traballar en España.

Os feitos ocorreron o mencionado día pola tarde, cando a vítima se precipitou ao baleiro desde unha carretilla elevadora na que se atopaba traballando. Urxencias Sanitarias-061 chegara a mobilizar o helicóptero con base en Santiago, pero os profesionais desprazados ao lugar só puideron confirmar o seu falecemento.

Por mor deste suceso, a Garda Civil iniciou unha investigación para esclarecer as circunstancias do sinistro. Así, os Equipos Territoriais de Policía Xudicial constatou que, no momento dos feitos, o falecido carecía de equipamento de protección individual co que protexer, así como da acreditación legal para traballar en territorio nacional.

De tal modo, o Instituto Armado procedeu a realizar até tres detencións, a primeira delas o pasado xoves, 21 de marzo, e as outras en días posteriores.

En concreto, foron apresados un responsable da compañía promotora das obras de reforma e outros dous responsables da empresa contratada para a súa execución. O tres quedaron en liberdade xa en sede policial.